Jer 20 | NdeIBE | STEP | Kwathi uPhashuri umphristi indodana ka-Imeri, induna enkulu ethempelini likaJehova, ezwe uJeremiya ephrofetha lezizinto,

Jeremiah 20

UJeremiya LoPhashuri

1 Kwathi uPhashuri umphristi indodana ka-Imeri, induna enkulu ethempelini likaJehova, ezwe uJeremiya ephrofetha lezizinto, 2 wenza ukuthi uJeremiya umphrofethi atshaywe njalo wamvalela esitokisini eSangweni laPhezulu koBhenjamini ethempelini likaJehova. 3 Ngosuku olwalandelayo, uPhashuri esemkhupha esitokisini, uJeremiya wathi kuye, “Ibizo lakho oliphiwe nguJehova akusuPhashuri, kodwa uMagori-Misabibi,

4 ngoba uJehova uthi: ‘Ngizakwenza wesabeke kuwe lakubo bonke abangane bakho; uzababona ngamehlo akho besiwa ngenkemba yezitha zabo. UJuda wonke ngizamnikela enkosini yaseBhabhiloni, ezabathumba ibase eBhabhiloni loba ibabulale ngenkemba. 5 Yonke inotho yedolobho leli ngizayipha izitha zabo – zonke izithelo zalo, zonke izinto zalo eziligugu kanye lemfuyo yonke yamakhosi akoJuda zizayithumba njengempango ziyithwalele eBhabhiloni. 6 Wena Phashuri, labo bonke abahlala endlini yakho lizathunjwa liye eBhabhiloni. Uzafela khonale, ungcwatshwe khonale, wena kanye labangane bakho bonke ophrofetha amanga kubo.’ ”

Insolo KaJeremiya

7 Awu Jehova, wangiyenga, ngayengeka; wangehlula wanqoba. Ngiyahlekwa izinsuku zonke; bonke bayangiklolodela.

8 Zonke izikhathi lapho ngikhuluma, ngiyakhala ngimemezela ukuba kube lodlakela lokuchitheka. Ngakho ilizwi likaJehova selingilethele isithuko lensolo ilanga lonke.

9 Kodwa nxa ngisithi, “Kangiyikumqamba loba ngikhulume ngebizo lakhe futhi,” ilizwi lakhe lisenhliziyweni yami njengomlilo, umlilo ovalelwe emathanjeni ami. Sengidiniwe ngokuligodla ngaphakathi; impela, ngingeke nganelise.

10 Ngizwa abanengi benyenyeza besithi, “Kulokuthuthumela indawo yonke! Mmangaleleni! Kasimmangalele!” Abangane bami bonke balindele ukuwa kwami, besithi, “Mhlawumbe uzayangeka; lapho-ke sizamehlula siphindisele kuye.”

11 Kodwa uJehova ulami njengebutho elilamandla; ngakho abangihluphayo bazakuwa banganqobi. Bazakwehluleka njalo bayangeke kakhulu; ihlazo labo kaliyikukhohlakala lanini.

12 Awu Jehova Somandla, wena obahlolayo abalungileyo, uhlole inhliziyo lengqondo, kangibone ukuphindisela kwakho kubo, ngoba indaba yami ngiyinikele kuwe.

13 Hlabelani kuJehova! Dumisani uJehova! Uhlenga impilo yabaswelayo ezandleni zababi.

14 Kaluqalekiswe usuku engazalwa ngalo! Usuku umama angizala ngalo kalungabusiswa!

15 Kaqalekiswe umuntu owayabikela ubaba izindaba, owamemeza wathaba, esithi, “Uzalelwe umntwana – yindodana!”

16 Lowomuntu kabe njengamadolobho uJehova awachitha kungekho sihawu. Kezwe ukulila ekuseni, lomkhosi wempi emini.

17 Ngoba kangibulalelanga esiswini, umama enjengengcwaba lami, isisu sakhe sikhukhumele kokuphela.

18 Ngaphumelani esiswini ukuba ngibone uhlupho losizi njalo akuthi ngiphethe izinsuku zami ngiphakathi kwehlazo?